Mót 9. maí

Annað mót Kotrufélagsins var haldið laugardaginn 9. maí á Bar 108. Meðan veður leyfði var spilað í sól og blíðu á svölum Bars 108 en síðan sáust blikur á lofti, teningarnir héldu áfram að svíkja Inga Tandra og stuttu síðar hafði heldur betur þykknað upp - í Inga, veðrið var fínt, hvessti bara aðeins. Mótinu lauk innandyra með æsispennandi úrslitaleik milli Stefáns Freys og Róberts, forseta og varaforseta, og endaði með sigri þess hærra setta.

Fyrsti stjórnarfundurinn

Fyrsti stjórnarfundurinn var haldinn laugardaginn 9. maí á Bar 108. Fundarritun var í fagmannlegum höndum ritara félagsins.

 

Stjórnarfundur Kotrufélagsins, 9. maí, 2009.

 Dagskrá

1. Útfærsla stigareikninga.
2. Almennt mótafyrirkomulag.
3. Íslandsmót.
4. Ýmis mál
5. Ákvörðun næsta stjórnarfundar.

Mættir: SFG, GG, GH, BB, RL

Niðurstöður:

1. Stiganefnd stofnuð, skipuð Stefáni Frey Guðmundssyni, Gunnari Gunnarsson og Róberti Lagerman.
2. Stefnt á mánaðarleg mót. Mótanefnd stofnuð, skipuð Inga Tandra Traustasyni, Gísla Hrafnkelssyni og Jorge Fonseca.
3. Almennt haldið í lok tímabils (ca. apríl). Stefnum á október 2009 vegna þess að við erum of sein fyrir apríl tímamörkin. Skilyrði að vera komin í samband við önnur félög áður en það er haldið til að tryggja þátttöku allra helstu spilara landsins. Mótið skal vera opið öllum þátttöku. Íslandsmótanefnd stofnuð, skipuð Forseta, varaforseta og ritara. Hún leggur til fyrirkomulag fyrir næsta stjórnarfund.
4. Ýmis mál sem komu upp á fundinum:
   1. Fræðsluefni: Setja efni á netið, Gísli Hrafnkelssson sér um það.
   2. Stofna fréttasíðu Kotrufélagsins: Hugmyndin er kotra.blog.is, Gísli er ritstjóri síðunnar.
   3. Fjölga kvenfólki í félaginu: Biggi er í því.
   4. Peningasöfnun: Leyfa frjáls framlög. Gísli gjaldkeri stofnar bankareikning þegar kennitala leggur fyrir. Gjöld verða nýtt til að kaupa borð og búnað.
   5. Stofnunargjald: Var greitt af forseta og varaforseta.
   6. Aðsetur: Róbert athugar með það.

      5. Næsti stjórnarfundur skal haldinn fljótlega eftir að kennitala berst. Forseti boðar fund.

Því má bæta við að kennitalan barst fimmtudaginn 15. maí og er 470509-2280..

 

 

Fyrsta mót

Fyrsta mót Kotrufélagsins var haldið strax eftir stofnfund, þann 7. mars 2009 á Bar 108. Keppnin var æsispennandi og til merkis um baráttuna má taka að eftir þrjár umferðir höfðu allir keppendur tapað leik. Úrslitaleikur var milli Stefáns Freys og Gunnars þar sem Gunnar var um tíma með 5 steina á bjálkanum en átti ótrúlega endurkomu og vann.

Kotrufélagið

Kotrufélagið var stofnað 7. mars 2009 á Bar 108. Á stofnfundinn mættu Stefán Freyr Guðmundsson, Róbert Lagerman, Gísli Hrafnkelsson, Gunnar Gunnarsson, Helga Guðrún Eiríksdóttir, Birgir Berndsen, Þorvarður Fannar Ólafsson og Steingrímur Aðalsteinsson. Lög félagsins voru samþykkt og stjórn kosin.

 

 

Lög Kotrufélagsins

 

 

1.gr.

Félagið heitir Kotrufélagið.

 

2.gr.

Heimili félagsins og varnarþing er að Skúlaskeiði 14, 220 Hafnarfirði.

 

3.gr.

Tilgangur félagsins er að stuðla að framgangi kotru.

 

4.gr.

Tilgangi sínum hyggst félagið ná með að halda reglulega mót og kynna kotru.

 

5.gr.

Stofnfélagar eru:

Stefán Freyr Guðmundsson

Róbert Lagerman

Gísli Hrafnkelsson

Gunnar Gunnarsson

Helga Guðrún Eiríksdóttir

Birgir Berndsen

Þorvarður Fannar Ólafsson

Steingrímur Aðalsteinsson

 

6.gr.

Öllum sem áhuga hafa á kotru er heimilt að ganga í félagið.

 

7.gr.

Stjórn félagsins skal skipuð 5 félagsmönnum, þ.e. forseta, varaforseta, gjaldkera, ritara og 1 meðstjórnenda. Einnig skulu kosnir tveir varamenn. Stjórnarmenn skulu kosnir til eins árs í senn en forseti skal kosinn á hverjum aðalfundi. Forseti boðar stjórnarmenn á stjórnarfundi þegar þurfa þykir.

 

Daglega umsjón félagsins annast forseti og varaforseti.

 

Firmaritun félagsins er í höndum allrar stjórnar sameiginlega.

 

8.gr.

Starfstímabil félagsins er almanaksárið. Á aðalfundi félagsins skal stjórn gera upp árangur liðins árs. Aðeins félagsmenn mega vera þátttakendur í aðalfundi. Aðalfundur skal haldinn á tímabilinu 1. janúar til 31. desember.

 

9.gr.

Fjármögnun félagsins verður með styrkjum og mótsgjöldum.

 

10.gr.

Rekstrarafgangi/hagnaði af starfsemi félagsins skal varið til að stuðla að framgangi kotru.

 

11.gr.

Ákvörðun um slit félags verður tekin á stjórnarfundi með auknum meirihluta (4 af 5 stjórnarmönnum) og renna eignir þess til að kaupa kotruborð fyrir grunnskóla.

 

Lög þessi voru samþykkt á stofnfundi félagsins og ölast gildi 7. mars 2009.

 

 

7. mars 2009

Forseti: Stefán Freyr Guðmundsson

Varaforseti: Róbert Lagerman

Gjaldkeri: Gísli Hrafnkelsson

Ritari: Gunnar Gunnarsson

Meðstjórnandi: Helga Guðrún Eiríksdóttir

 

1. varamaður: Birgir Berndsen
2. varamaður: Þorvarður Fannar Ólafsson